قصة حزينة تصلح تكون فلم
هذي قصة حزينة حدثت منذو مبطي وتصلح تكون مسلسل مكسيكي
نبدا القصة
وأنا جاي من صياعتي آخر العصر قريب من آذان المغرب لما يخش الشروق على
الغروب،كانت حالتي يرثى لها من لعب الكورة على بالي شيفشينكو .أطلق شي
سويته في المبارة ناولت كعب.
المهم وأنا قاعد أتسحب للبيت والكسارات لابسها بيديني تقول قفازات شفت أخوي
الصغير جاي من البقالة قلت أيوه لقيت لي أحد أتحارش معه.
وأقعد انتظره عند الباب وهو يوم شافني درا أني ناويه وهو اللي يبطئ مشيه
ويمشي على مهله وماوصل الى الباب الا على صلاة العشاء
وأجي مقلع وأستقبله بكف وهو اللي يصطرني بعصير راني حبيبات على جبهتي
وقال لي والغضب يملأ شوشته: أنقلع منت أخوي ولا أنا أعرف ولا عاد تجي بيتنا
ثاني مرة فاهم؟
ويصك الباب بأقوى ما عنده، أنا هنا تحطمت نفسيا ،بيتنا اللي عشت فيه عمري
كله(مع تحيات وائل كفوري) وقضيت أحلى أيامي وأجمل زبناتي يطردني منه
كومة الشعر ذا.
رحت أسئل أهلي عن حقيقة نفسي فقالوا لي أني ماني ولدهم وأنما هم لقوني
بكرتون حليب بوني هدية بدال القلم.
أنا قلت له مالي قعده معكم أباخذ ثيابي وأخلي لكم البيت باللي فيه(متأثر
بفاتن حمامة(.
والله وأربط ثيابي بشماغ وأشيلها بعصا وأنا أنزل من الدرج طلعت أغنية حزينه
وأهلي كلهم عند الدرج واقفين يبكون وحال لسانهم يقول(ياليت ربي ماخلق حب
وأفراق و إلا خلق حب على غير فرقا).
وأطلع أنا أتمشى على البحر مسوي حزين مثل فؤاد بخش وأنا أتمشى وأفكر
بعمق ما دريت الا وانا بوسط البحر
وأنا أتمشى وأفكر بعمق جاني شخص وإذا به يطلع عبد الجبار راعي البقالة
وأشرح له أن أخوي الصغير طردني وأني أبقزرها على الفنادق الخمس نجوم
ألين ما تتعدل الأمور لأني أخذت كل بطاقة ماستر كارد موجودة في البيت حتى
بطاقة زجول أخذتها من زود النجاسة.
قال تجلس بفندق وعزبتي موجودة هزلت بما تقول به العرب << -- وش عنده حاتم
الطائي؟
والله ويحلف أني أجي عنده حتى يفرجها رب العالمين والله ويكرمني كرم يهايط
على هياط ماهو موجود عندأحد.
ويسوي ويفعل ويعمل عمايل جدي نساها.
أول ماقلطت عنده يقوم ينحر القعود قدامي.
ويسوق علي دلة قهوة مهيلة وبيالة الشاي اللي ماهي صاحية وأتوقع أنه
غشني لاني بعد بيالة الشاي صرت شاعر على سن ورمح.
وماقصر جزاه الله خير يوم أنه لقالي شغل ببقالتة.
ومع مرور الأيام صارت البقالة سوبرماركت له أسمه في السوق(شركة سابك
ماهي بقالة) وأقترحت أنا وعبدالجبار لصاحب البقالة أننا ننزل أسهم
السوبرماركت.
نزلنا الاسهم في بورصة ناسداك للأوراق المالية وماقعدت يومين الا والدولار طايح
بسببنا
ولازلت أنا والهندي مع بعض الى أن جاءت لحظة الوداع وجمع له قرشين وسافر
لأهله.
وكل ما أمر على بيت أهلي اللي ما هم أهلي أفحط وأتفل عليه.
ومرة وأنا قاعد أرتب أوراق السوبرماركت واشوف وش لنا وش علينا دخل علي
الزنجي وقال أنا جايب لك زبون يبي منك تموين كامل لمدة خمس سنوات قلت
تحري بها والله قال بس لي عمولة قلت والله أني داري أنها مو لله.
أتفقت عليه أنه يجيب الزبون عندي يوم شفته ما صدقت طلع توم كروز وأغمي
علي ويقعد الزنجي يرشني بالموية ويدق لي خبيتي قمت منزعج وكسرت الطيران
على راسه قلت له شايفني مثلك يوم تدق لي.
وأقوم وأعتذر من أبو الشباب اللي عندي وأخلي خويي يصلح لنا شاي من اللي
هو خابره .
قعدت اراجع الاوراق اللي جايبها لي تووم كروز وأناظر فيه بنص عين ما أمداه
يكمل كلامه ألا عطيته بالملف على جبهته وطردته . طلعت عليه أقساط ددسن
ماهو مسددها والمعارض تطلبه خلصت شغلي آخر الليل زي الخلق والبشر وأتممته على الوجه الصحيح.
وأنا طالع كان فيه شلة فاسدة بآخر الشارع
طنت براسي أعطيها وحدة مع اللفة وأجي طاير وأدخلها مع اللفة ويقعدون
يصفقون ويصايحون.
أنا أنتفخ راسي بقوة قلت لازم آخذ شوط ثاني.وأعطيها نطلتين وعكسية
ويزيد التصفيق والحماس وأنحرج معاهم قلت لازم أكلمهم.
قلت لهم يا شباب لا تعطوني أكثر من حجمي نط واحد منهم وقالي وخر بس خلنا
نشوف زين.
وأطالع وراي وأشوف سواقة في حياتي ما شفتها ودريت أن التصفيق ماهو لي
فسحبت نفسي أصرف لي.
حركت وعطيت الموتر حقه وبالطريق للعزبة قدّر الله علي وسويت حادث لكن لا تخافون أنا مأمن على الرخصة لكن ما صحيت الا بالمستشفى من قوة
الحادث.
وأنا أخلص أجراءات المستشفى دخلت الارشيف ومن باب المصادفة لقيت ملفي
ولقيت أني ولد أمي وأبوي مية بالمية وأتحرى أكثرعن سبب الطردة المحترمة
طلعت المؤامرة مدبرة من أخواني علشان ياخذون راحتهم بالبلاي ستيشن
والتلفزيون
وأدخل عليهم برشاش وأجمعهم واحد ورا الثاني وأقعد اكفخ فيهم وأطبق عليهم
حركات المصارعة<< شون مايكل
الشرهه مو عليهم الشرهه على أمي اللي مصدقتهم أول ما شافتني تغطت عني
يعنني ماني محرم لها.
وأجمع أغراضي من العزبة وأتكي علة على قلوبهم.
والى اليوم تجري المفاوضات بشأن أتفاقية خارطة البلاي ستيشن بيني وبين
أخواني.