.
سيّد اللذه هلا يامرحبا قرّب تعال
اقرب اكثر .. لا بعد اكثر .. وربي انك ملك
كنك من الصبح خير وشمس وأنفاس ودلال
وكنك من العطر صدر وبوح .. واعجازك فلك
قرّب .. انحازت عيوني لك وله .. مالي مجال
غير ارحّب بك وامد الوصل لك واواصلك
فقت احساسي ـ ( الوه ) الاوله قبل الجدال
يوم اقول لك انت لي وتقول لي مانيب لك
والله انك فقتها من جد .. والفارق خيال
وين انا ؟ مالت عليّ ! وشلون كنت اتخيلك
صورتك .. صوتك .. جسدك .. اشياء ما مرت ببال
يزهد الدنيا واهلها كل من يتأملك
اشهد ولله الكمال انك دلاله عالكمال
من يشوفك يدري ان الله حق وكمّلك
كل شي فيك امتناسق ياحلاة الاعتدال
كل ماتطغاك فتنة .. فتنتين تعدّلك
لو زمن عشتار يافينوس وافورديت زال
ماتزول اسطورتك من دهشة اللي بسملك
ألف بسم الله علييك .. وألف شكراً للوصال
وألف والنعم فيك وفـ أمك وفـ باقي هلك
حي بطنٍ جابتك .. افذمتي انك راس مال
لا القلم يقدر عليك .. ولا الكلام يجملك
انت ضرب من الخيال .. الا انت ضرب من المحال
الا انت معنى للخرافه من علوّك لاسفلك
ياسعْد عين اللي ملكك وذاق طعمك بالحلال
الله يهينه لو يفرط فيك والا يزعلك
الصغاير في عيونه تصبح لعينك جلال
ان تصاعبك ابتلش بك .. وان تساهلك اخذلك
كل زهرة في تفاصيلك محاطة بالسؤال
وكل ماجاوبك يمطّرك الشذى ويبللك
الأكيد ان احتمالاتك تحب الاحتمال
واحتمالاتي أكيد اني احب احللك
مرتين بقوّ باس ومرتين باعتدال
اربع افكارٍ تساورني قبل ما اقبّلك
ما لحد منه .. ولا .. والفين لا .. للإبتذال
جابك الله لي .. ورابعها وصلت معدّلك
آآآآه يامحلى جهاتك .. من جنوبك للشمال
وآآآه يامحلى آخرك عندي .. ويامحلى أولك
افترش نبضي وقهوي الذاكرة ماك الزلال
بي ضما .. يالذّة الما .. صب لي مستقبلك
مرحبا في مرحبا في مرحبا .. قرّب تعال
ادخل بحضني .. قسم باللي خقلك انك ملك
تعليق