من عقب ماني غالية بيـن غاليـن

بسم الله الرحمن الرحيم



هذه القصيدة تحكي واقع كثير من الفتيا ت اللاتي انتهى بهنّ المصير في دار الملاحظة



جراء الحب الزائف الوهمي مع الذئاب البشرية



صغتها على لسان حالهن







قصة فتاة





من عقب ماني غالية بيـن غاليـن



مابين عطف امي وابوي مغمـوره

اصبحت في دارٍ تلاحظنـي العيـن
منبـوذةٍ مذمـومـةٍ ومحـقـوره
ابوي ما يبغى يجي ذكـر طاريـن
وامي من اسباب المصاب محسوره
خسرت كل اللي من اول مصافيـن
طاح الشرف والعرض وانهدّ سوره
تاخذني الحسرة على العرض والدين
اللـي مضيّعتـه بليـا مـشـوره
غامرت في حب وحنـان المحبيـن
في وسط غابات الهـلاك ونمـوره
وابتزني من لايعرف الحيا ...ويـن
وحشٍ نزع من كل قلبـه شعـوره
واختل في وجهي جميع الموازيـن
وفضيحتي بيـن الجميـع مخبـوره
وشلون ابا ارفع للبشر نظرة العين
وش قولتي لاهل القلـوب الغيـوره
لو اعتـذر لوجيـه كـل الملاييـن
مانيب من كـل الوجيـه معـذوره
من كثر حزنٍ حلّ في وقتي الشيـن
كنّه نزع قلب الشقا .... من جذوره
كم اكتويت من الاسـى والامرّيـن
وكم ليلةٍ فيهـا الدمـوع مهمـوره
هذي نهايه ... في صداقات غاوين
هذي نهايـات الفسـاد وسفـوره
نصيحتي ياللي على الدرب تمشيـن
درب الخطر لاتامني مـن شـروره
يابنت توبـي واعلنيهـا وهالحيـن
من قبل بركانـه بوجهـك يثـوره
يابنت صوني زينة العرض تكفيـن
ما للشرف تعويض لا غـاب دوره






منصور الحبيل

الله يهدي شباب وبنات المسلمين..