هادي مقــاله عـاميه حجـازيه بحته يا ليت تقروهــا وتعطـوني رايكم..
وعلى فكره تراهــا للكــاتب الكبيـــر فتحي حلواني..
صباح الخير والفل والياسمين يا حبايب وكل سنة وانتو بخير وصحة وسلامة.. اليوم رابع ايام سنتنا الجديدة فياريت تتصفى القلوب واللي بينه وبين احد من اهله أو اصحابه أو اقاربه أو جيرانه مشاكل وقطيعه ياريت يحاول قدر المستطاع انه يشفلها حل لانه هادي الدنيا تافهة وما تستاهل ومحد حياخد منها حاجة وكل انسان وعمله.. المهم خلينا ندخل في هرجتنا.. كنت بمشي انا وام فتو على رصيف من الارصفة المشهورة اللي بيمشوا عليها الاوادم لانه الغلابا اللي زينا ما عندهم مكان يمشوا فيه الا هادي الاماكن لانه البلد ما فيها مساحات خضراء زي اللي موجودة في بلاد بره عشان الواحد يقدر يمارس رياضة المشي فيها لانه كل ما كانت في ارض فاضيه كبيرة نقول في بالنا خلاص هادي الارض شكلها كده حتصير مساحات خضراء عشان يمشوا فيها اللي يحبوا رياضة المشي وشوية كده ما تلاقي الا والارض صارت بقدرة قادر موول من المووايل اللي من كترها صارت زي العمى على القلب.
وأساسا هادي المووايل ما فيها لابيع ولا شراء وكل اللي فيها انتو عارفينه وبلاشي أهرج.
نفسي اشوف مساحات خضراء كتييره في بلدنا عشان رجال وحريم البلد يقدروا يمارسوا رياضة المشي أو الهروله براحتهم.. المهم وانا بمشي ويدي في يد أم فتو الا واشوفلك سيارتين من السيارات اللي بترش المبيدات وهيه ما شية زي السيخ ضحكت انا والحرمه وقلتلها فاكره زماااان يا أم فتو لما كانت زي هادي السيارات بتلف شوارع وازقة جدة وهيه بترش هداك الدخان عشان تموت الدبان والناموس كانت ايام حلوه لكن دحين البلد معدومه بالمجاري في كل شارع وزقاق والناموس شايف شغله مزبوط لانه اصحاب وايتات المجاري بيفرغوا عفن سياراتهم في مرمى الصرف الصحي اللي قريب من السكان وخاصة سكان الاحياء اللي في الاجواد والسامر والتوفيق والربيع والمنار وعشان كده سكان هادي الاحياء حاطين يدهم على قلوبهم من هادي البلاوي والقرف والروائح الكريهة اللي بتجيهم من هدا المرمى عشان كده بتمنى من الأمانة ومن وزارة الزراعة انها تشد حيلها أكتر من كده في حكاية الرش ولازم يكون الرش جوي وارضي في كل حي من احياء جدة في الشمال والجنوب والشرق والغرب عشان نقدر نتخلص من هادي اللي اسمها حمى الضنك اللي جابت لاهل البلد القلق هدا اذا عرفنا انه حصلت حالات وفاة من هدا المرض ونصيحتي لكل الحبايب في جدة انهم ما يشغلوا كنديشناتهم الا لما يرشوا فليت لانه الناموس يحب يعشش جوة الكونديشن وفي نهاية الهرجة اسال الله سبحانه وتعالى انه يحمينا ويحميكم من حمك الضنك وما جاورها وفي امان الله واشوفكم على خير.
.gif)
تعليق