قصة نمر بن عدوان وزوجته وضحى, نمر بن عدوان وقضية ابن مسلم.. كما وعدتكم

بسم الله الرحمن الرحيم

السلام عليكم ورحمة الله تعالى وبركاته

الحقيقه ياخوان قريت اكثر من روايه وكل روايه تناقض روايه
وانتم عارفين لابد من البهارات الزايده على بعض القصص
حتى اني عرفت من بعض الشباب انو حتى المسلسل الي في رمضان على MBC يقولون بهاراته مو طبيعيه
وهذ الي يقهرنا
يعني مالنا مرجع
واكثر الغالبيه تبهر من البهارات مالله به عليم [ بهارات = كلام زايد من عندهم ]
اضرب لكم امثله

ناس قالو انه تزوج 90 بنت اسمها وضحى
وناس قالو عشرين

ناس قالو انها ماتت وهي تحلب الناقه
وناس قالو انها ماتت على انها بتسرق الناقه
وناس قالو انها ماتت وهي بتسرق الخيل
وناس وناس

لكن خذو هالقصة
هذا الله يسلمكم بطل قصتنا اسمه نمر بن عدوان وهو الي تسبب بشهرة اكبر فنانين الخليج العربي بقصيدة البارحه الي غناها اكثر من فنان واولهم راشد الماجد في صغره
ومثل ماوعدت بعض الاخوان هنا في منتديات ومجالس بلنسية اني اجيب لهم القصة من اولها لاخرها
بداية القصة تبداء ياحبايبي بنمر بن عدوان يذكر غالبة الروائيين انه عريض طويل وفارس وشجاع وله مواقفه بين القبايل من فزعات وخلافه
حب بطلنا انه يتزوج ويكمل نصف دينه وذكرت له بنت جميله وعلى قدر عالي من الجمال .
سير نمر بن عدوان وتقدم للبنت لكن الي صار انو عند ابو بنت بنت يتيمه اسمها وضحى قالت له قدمني على بنت وانتم عارفين ان اهلنا الاولين مجاعه وفقر وجوع واذا عندهم يتيم يبتلشون فيه يخافون عليه من الجوع المهم انه قدمها على بنته وتزوجها طبعا وضحى انسانه بسيطه جدا ومافيها ذاك الجمال ...
في ليلة الدخله يوم شافها نمر بن عدوان ماعجبته
ونام على جمبه الثاني وعطاها ظهره .... البنت ضاقت فيها الدنيا
ويوم نام نمر بن عدوان صارت على راسه وتبكي لحد مانزلت دموعها عليه ... وصحى من نومه...
قالت له.. انا عاررفه اني ماعجبتك لكن عطني يابن الاجواد مده عن القيل والقال وهرج الناس... وانتم زي ماتعرفون نمر بن عدوان انسان شجاع وفارس وله مواقفه فقالها.. ابشري يا بنت الاجواد لك مابغيتي
وبين هالفترة هذي قامت وضحى بخدمه على مايحب ولاتخلي شي ينقصه.... ونزل في قلب نمر بن عدوان محبة لوضحى من سابع سماء مايفرط فيها باي ثمن.......
جابت وضحى من نمر بن عدوان على مر عشر سنوات عيال واكبرهم اسمه عقاب... وطيلة هالوقت بطلنا نمر بن عدوان يحب وضحى حب ماحبه بشر...
وفي يوم اسود من الايام... وهي كل عادة من ايامهم
انو لاجى مسيان تكون الفرس مربوطه والعشاء ان وجد جاهز...
لكن الي صار في يومهم االاسود انو وضحى انشغلت بالبيت والعيال ونست على العادة انها تربط الفرس بعد حضور نمر بن عدوان على غير عادته لانه جاي بدري ...
المهم يوم جا وقت الفراش والنوم وهي العادة تقوم وتدلكه من اوله لاخره حتى ينام سألها... قالها.... ربطتي الفرس؟؟؟؟
قالت ايه طال عمرك الفرس مربوطه.... طبعا الفرس لاهي مربوطه ولا شي لانو مثل ماذكرت لكم انو وضحى نست انها تربط الفرس
خلت وضحى نمر بن عدوان ينام ... وسحبت نفسها عشان تربط الفرس
طبعا الربط بالسلاسل .. المراد انه طلع صوت من الحديد ونمر على اسمه نمر قام فز من نومه واخذ باروده واحساسه يقول حرامي....
طبعا الي ذكره غالب الروائيين انو وضحى كان لها جدايل طويله وشعرها ناعم جدا وهي الميزه الوحيده الي بوضحى... ولان جدايل وضحى طويله..كانت منزله راسها على الحديد وهي واقفه وانزله معها جدايلها ... هذا الي خلى نمر بن عدوان يصرخ ويقول اطلع ولا ذبحتك
طبعا نمر مفكره حرامي ... ووضحى ترتعد خوف.. جت تبي تطلع لها على نزلتهها رفعت راسها الا والله زول حرامي























طااااااااااااااااااااااااااااخ

ويرميها بباروده نمر بن عدوان مفكر انه حرامي
ويوم قرب بيعرف مين هالحرامي
الا والله هذي وضحى غرقانه بدمها وتمتم بالحكي

قالت له ذبحتني يانمر
قالها انتي الي ذبحتي نفسك وش الي مطلعك بالليل
قالت له امي وابوي ماعمرو بهالدنيا عشان انا اعمر
لكن والله ثم والله يانمر يابن عدوان اني متحسفة بريحتك على الحريم من بعدي !!!!!!!!!!
وماتت ................
جت هالكلمة مثل الصاعقه عليه [ انا متحسفه على ريحتك على الحريم من بعدي ]
صار الفجر وكفنوها وصلو عليها وادفنوها
جا اليوم الي بعده
وتغيرت الاحول... مافيه وضحى... مافيه ذاك الغزال الي مايبيعه ولايفرط فيه.... وجال الليل والسكون.... وجا النوم
جا الفراش نمر بن عدوان ونام على جمبه وجلس يبكي مثل اليتيم لحد مابلل جمبه من الدموع........ وراح على الجمب الثاني ويبلله بعد بالدموع...........
قام لحضتها وقال

البارحه يوم الخلايق نـــياما********* بيحت من كثرالبكا كل مكنون
قمت أتوجدله وانثــــرعلاما****** من موق عيني دمعهاكان مخزون
ولي ونة ٍ من سمعهامايناما******كني صويب ٍ بين الأضلاع مطعـون
ولاكما ونــة كثــــيرالسلاما *********خلوه ربعـــه للمعــادين مديون
ولافي ونة راعي بيت حماما ******غادي ٍ ذكرها والقوانيص يرمون
تسمعلهابين الجــرايد حطاما*****ومن نوحهاتدعي المواليف يبكون
مرحوم ياللي مات شهرالصياما*****صافي الجبين بليلة العيدمدفون
حطوعليه من الخرق ثوب خاما******** وقاموعليه من الترايب يهلون
مرحوم ياللي مامشى بالملاما******* جيران بيته راح مامنه يشكون
اخذت اناوياه عشــرة اعواما********* مامثلهن في كيفة ٍ مالهالون
والله كنه ياعرب صـرف عاما****** وياحيلة الله شغل الأيام وشلون
واكبرهمومي من بزور يتاما****** لاجـيتــهم قــدام وجـهـي يبكون
وان قلت لاتبكون قالوعلاما********* نبكي ويبكي مثلناكل محزون
قلت السبب تبكون قالويتاما********* قــلت اليــتيم اناوانتم تسجون
مع البزور وكـل جرح ٍ يلامـا********* الاجـــروح بخاطـري مايطيبون
قمت اتوجدعند ربع ٍ حشاما**********جوني على فرقاخليلي يعزون
قالو تزوج وانس لامــه بلاما ******وترى العذارى عن بعضهن يسلون
قلت انااخاف من غاديات الذماما ***اللي على ضيم الدهرمايساعدون
تزعل عيالي بالنهروالكلاما **********واناتجــرعني من المربغـصون
والله لـولاهـالصغـاراليــتاما *******واخاف عليهم من السكه يضيعون
لاقول كل البيض بعده حراما*****واصبركمايصبرعلى الحبس مسجون
عـليـــه مني كل يوم سـلاما********عدة حجيج البيت واللي يطوفون
وعــدادمــانبة نفل والختاما*********على النبي ياللي حضرتوتصلون

طبعا بعض الرواة ذكرو انه تزوج لكن الغالب ممن ذكرو انه لم يتزوج
ويرجعون لقصيدته

قلت انااخاف من غاديات الذماما ***اللي على ضيم الدهر مايساعدون
تزعل عيالي بالنهرو الكلاما **********وانا تجــرعني من المر بغـصون

وناس ترجع للبيت هذا على انه الموافقه
والله لـولاهـالصغـاراليــتاما *******واخاف عليهم من السكه يضيعون

لكن الغالب والراجح انه لم يتزوج وهذا ما اكده الراوي التويجري حيث ان له قصيده ثانية تناقض قضية انه يتزوج حيث ان احد اقاربه ارسل له قصيده يتشره عليه انو للحين ماتزوج ورد عليه نمر بن عدوان بقصيدة... لاتحضرني لكن لعيون اعضاء منتديات ومجالس بلنسية راح نوفر الماده في وقت لاحق
في نهاية ايام نمر بن عدوان كان جالس تحت طلحه ويتذكر الايام الحلوة وقلبه الحزين مثل اوجاعه...
شافه ابنه الكبير عقاب ... وانتم تعرفون ان الاولاد في زمانهم يحنون على ابوهم في كل شي ولايبخلون فيهم ورجواهم رضى الوالدين.. مو زي حالنا هالحين الا من رحم الله..
المهم عقاب شاف ابوه حزين... سأله وقاله ... وش فيك يابو ليه متضايق... قال نمر لولده ابد مافي شي..
قام عقاب وطلع الشبريه وقال والله لو ماقلت لي وش الي مضايقك لاشق بطني....
لان عقاب خاف يكون انو احد مضايق ابوه ولا احد مزعله وابوه مايبي يقوله....
قال نمر ابد ياوليدي بس تذكرت ايام مع امك وحنيت للايام ...
عقاب هانت عليه مصيبته .... وحابب يهونها على ابوه بالمداعبه وقال عقاب لابوه.... مين امي !!
الي كل عمرنا ندربي الشري تحتها
طبعا للي مايعرفون الشري... ههذي نبته طعمها مر جدا جدا حتى البهائم الله يكرمكم ماتاكلها

طبعا كانت هالكلمة مثل الصاعقه على نمر بن عدوان من ولده
صرخها جملة واحده

هذا بلى ابوك ياعقاب

وعلى جلسته ماقام منها.... لانه مات
اي مات نمر بن عدوان وخلد لنا موروث عربي اصيل عن الحب الطاهر العفيف ... ورث لنا ارث جميل بالقصيد وكنز جميل بمعنى الوفاء
مو موروث روميو وجوليت من اطروحات شكسبير

هذي قصة بطلنا نمر بن عدوان
من اولها لاخرها
اجل قصه مازالت تعيش في ذاكرتي
ومن حبي للقصة جهودي الخاصة بالبحث عن اصولها وصالة معانيها وحقيقة مايدار حول القصة
واغرب ماوجدت... الشاعر محمد ابن مسلم احد شعراء ان لم تخني الذاكره من الاحساء وبشكل عموم من اهل الشرقيه ...ذكر بعض الروات المخالفين للقصة انها ليست القصيدة [ البارحه يوم الخلايق نياما ] انها ليست لنمر بن عدوان .. وان لم تخني الذاكره ايضا ان الراوي محمد الشرهان مابين مرجح لنمر بن عدوان ومابين مخالف ولايعلم السر حتى هذه اللحظة...

امر سيئ؟

بالعكس
من اللذ الاشياء هي البحث عن ماهو جميل في كل مكان...

قرابة الساعه في كتابة هذه القصة الاكثر من رائعه لاحبابنا في منتديات ومجالس بلنسية.. اتمنى من كل قلبي انها تنال اعجابكم واستحسانكم.. ولكم من اخوكم ارقها تحية

اخوكم ابو فيصل
منتظر بشغف ردودكم وتعليقاتكم