قصيدة نادرة من تأليف خادم الحرمين الشريفين..الله يرحمهم
(( خادم الحرمين الشريفين الملك\فهد بن عبد العزيز رحمه الله ..))
عندما كان مريضا في لندن في شهر شوال من عام 1385هجري
حيث بعثها إلى المرحوم الأمير فهد بن سعد يشكو فيها
قسوة المرض حيث قال
يا بو سعد صارت على أخوك غارات
شهرين أقاسي من شديد الغرابيل
سوالمرض يحمل على أخوك حملات
مافي يدي حيله ولا في يدي حيل
والله فزع من فوق سبع السماوات
وأنا أحمد الله يوم صارت تساهيل
ماينفع الخايف والأيام عجلات
لخوف ماينفع ولا القول والقيل
حنا هل العوجا ولابه مراوات
شرب المصايب مثل شرب الفناجيل
لاشك أنا مشغول في كل الأوقات
على الذي حنا بظله رجاجيل
ماني على نفسي كثيرالحسافات
لا سلم راسه روسنا رفاع با لحيل
حامي حمانا بالليالي المخيفات
لو صار بالعالم كثير الزلايل
فخر العروبه بالعدل والمساواه
هذاك هو فيصل ولا فيه تشكيل
يشهد له اللي شاهدوا منه ليات
ويشهد له التاريخ جيل بعد جيل
القائل
خادم الحرمين الشريفين
الملك فهد بن عبد العزيز ال سعود
~~~~~~~~~~~~~~~~~~~~~~~~~~~~~~~~~~~~~~~~~~
رد عليه الامير فهد { الله يرحمه } يقول
يا مرحبا بكتاب زبن المخلات
اهلا هلا به عد وبل الهماليل
حمدت من زال الكدر بالمسرات
فكاك من صكت عليه المحابيل
فزع لك اللي عالم بالخفيات
مبرى جروح ايوب غيث المراميل
لعل ما يزعج على فقدك اصوات
ولعلها لك يابو فيصل تماهيل
الله يجيرك من صواديف الافات
عساك تسلم يا عشير المشاكيل
منتب رخيص يا ربيع القرابات
لو هي بالايدي كان دونك حلاحيل
ترا النا بك يافتى الجود هقوات
في وقتنا الحاضر وباللي مقابيل
يفداك ربع قصروا بالمهمات
اللي على القالات ما تنطح الشيل
بعض العرب حي ومن عرض الاموات
ما يرتجي نفعه بحل المشاكيل
وفيصل ذرانا بالسنين المخيفات
هو درعنا الضافي الى ضدنا الميل
اللي نقل عنا حمول ثقيلات
راس الحصيل إن كملن المحاصيل
تعليق